TECKNOTPROGRAMA GLA POSK AN KANGARIA SIMALI 2021

Kortprogram på resanderomani i kyrkovalet 2021

POSK – Partija pòlitikast otavat an Svedoa kangarian

VIZIJA

POSKs vizija honkar te Svedoa kangarian nasht  asha jeck babararipe savo glinder Devels maipa an Devels ceremonija  ta jibb ta savo rakkra haljovdot bási Jesus Kristus.

JECK MUCK KANGARIA

POSK ginder te partijarnas pheribe preal Svedoa kangarian mostula shinavela. Pakjibealuinel fann dole kubar vrikerelar lockho regularir gla kangarian ashter so savo chanir gla them ta komùna. Svedoa kangarias agorbe nasht asha demokratijist simada ta reprezentiriphe khedipar, tji politikas partijar.

POSK mangela fakka gla

  • Te avekarela simali sistemit sav te kava ovelar lokkigare ta emrepare.
  • Te biskopija perdosoralo ta kangaritrissades Ingarelatrissar simslis attjar khediparna an indirakti simali.
  • Te jeck ikerkerdo ninna honorari attjar pakjibe opprecitni nashta dikhelas.
  • Te agorbe savo roddra khedipen astarelas sav nerride bukjakeripen ta desenorna savo saj.
  • Te rodkerela nacionalipha usipes ta biskopijat teologijas them ta opprecitni.

BÙTIPE – JECK SAIPET

Andre ramen gla Svedoa kangarians pattja, beknuselse ta desanipe asjas bùchio te chibrakkra so kristijan pattja ta kristijat jibb andriker. Kava honkar barot ninna búvlo ta vidderprinjande an Devel cermonija jibbet ta te kava asjas najek nisanis sutt. Dolle kangaria puranokeriphar ta rigariper ta savo upris andre Svedoa kangarian ovela jeck bárvalopa.

POSK ginder

  • Te jeck kangaria ninna dóchal gla sass korokerebar sas diskriminiripe pre telipt attjar bij ta vavra  diskriminiripe teliper.
  • Te kava honkar barot te sass, oginda sexualiphe karakteri ire bijidentitit ire nisani, trisses ninna respekti ta sukaravada an Svedoa kangaria.
  • Te kava agorbe savo kangariatrisset kammar astarelat  bási jengnipa prele zija attjar savriga bij nasht ste soralo an siros saipe.
  • Te jeck sukart jurad ikeribe nasht nisani trissephat prele kubar ninna ulaveda haljoviber andre kangarian.

KHEDIPEN AN CENTRI

Te keribe jidro ta dzanibedejbe khedipar honkar kangarians  baroaste janepha ta jeck  barasavrig karand gla sass savo  parel kangarian. Khedipen ta kangarian honkar telipen gla svacko kristijans pattja ta gla sas savo kristijana nast kerre kettanes. Kangarian nasht sàrstil asha dolle tangaloa hango ta asha nico te sukaravada svacko manuscha.

POSK mangela fakka gla

  • Te idealipa ninnafakkare ashterpuchas, sikljojbas lasarelas ta ler dóchal.
  • Te khediparna fakkar butiket ninna kava sàrenikano fakket.
  • Te sikljovno basjt ta kusalo koncipti ismarels savo jikk knerke gla bukakening.
  • Te gijepá ta kangariabàschi honkar jeck scena savo haljovdot delar than gla ternos bàschi    nisani.
  • Te bútt kangariabàschir kammar knerkersikavibe an siros dindrastar.
  • Te svacko khedipe kammar jeck than gla dsanipan ta sikavibe fann teckno nucko to baro  basjtsipe.
  • Te kerel bukarela gla ta jikk bukja delas to internacialikano vastdearin ta kristijanipe.

JECK KANGARIA SAVO KERRE JAVERIPE  

Savo kristijana kammar vorsnos an opprecitni te administrinel keriben vorsnos honkar dòkkat attjar Devel ta te jidra kettanes ninna varvara. POSK mangela te Svedoa kangaria fakkar butike ninna te kerel dsando tjujal jekvakti puchar savo asterelar sarinipet ta sikkra pre jikk vavra sutt te jidra.

POSK mangela fakka gla

  • Te svacko khedipe nasht kamma tovolta to jeck vastdeari.
  • Te jeck bàroar kotar attjar dova deisibefinansirinela rahatipt ingas andre Svedoa kangarian.
  • Te Svedoa kangarian lelar dóchal gla keriben preal te korokereba klima avekerelar.
  • Te dumoja caciba dingel ta jikk soralot sukande attjar phuvens saipe.
  • Te sas administririphe attjar isibe nasht asha durihutno, efektiviphe ta kerelare etikano ta ekologijat  soralot.
  • Te arakhela kava baroa kultúramangin savo voro kangarier ovela ta te dolle rèkks phravda ninna kupa resutnophat.

 

Dole honkar jeck tecknoprograma attjar POSKs programa an kangaria simali 2021. Saroa programat  asjas te drabba pre svedoa.

Kyrkovalsinformation på olika språk, på Svenska kyrkans webb.