SEURAKUNTA KESKELÄ
Ruottin kirkko löytyy ilossa ja surussa missä seurakunta oon pohja ihmisen yhtheyessä hänen kirkon kans, kirkonmenoissa, kastheessa, rippiluussa ja hautajaisissa. Elävitten seurakuntain rakentaminen oon kirkon tärkein tehtävä ja yhtheinen kuttu kaikile jokka kuuluva kirkhoon. Kirkko häätyy aina olla valhmiina othaan vasthaan jokhaisen ihmisen olheen myötä seurakuntaelämässä, niinku nuorten ryhmässä, köörissä, kahvelassa eli kirkonmenoissa.
Posk halvaa tehhä työtä
- ette enämpi nuoria ottava ja saava tillaa päättävissä järjestöissä.
- ette vapaehtosia työntekiöitä kysythään, koulutethaan, innostethaan ja saava vastuuta.
- ette vahventaa seurakuntia ekymeenisseen työhön.
- ette trainee-vuosia ja muita senlaisia konseptiä käytethään rekryteerauksessa.
- ette jokasella seurakunnala oon suunittelu oppimiselle ja opetukselle pienestä lapsesta täytheen ikhään.
- ette suojela sitä kylttyyriperinettä, mihinkä meän kirkot kuuluva ja ette net oon auki ja sisälepääsö oon helppo.
- ette Ruottin kirkon virret oon vaphaat käyttää ja levittää.
- ette useamalla kirkkomyysikkerillä oon instrymentin opetusta heän virassa.
KIRKKO ILMAN PUOLUEPOLITIIKKAA
Ruottin kirkon päättäjät häätyvä olla temokraattisesti valitut ja eustaa heän seurakuntia.
POSK halvaa ette puolueitten vaikutus Ruottin kirkossa loppuu ja meinaa ette se oon mahoton ette sekylääriä puoluejärjestöitä oon myötä johtamassa uskokuntaa. Kirkon päätökset piethään enämpi tehhä yhessä ja yksmielisesti eikä tukea riitasta mieltä polittisten mielipieryhmitten välissä.
POSK halvaa tehhä työtä
- ette äänestyssystemi muutethaan helpomaksi ja halvemaksi.
- ette hiippakunnan valtuuston ja kirkkokokouksen jäsenet valithaan seurakunnissa välilisissä äänestyksissä.
- ette olhaan säästäväiset palkkion jakamisessa luottamustehtäville.
- ette päätökset jokka koskeva seurakuntaa otethaan niin lähelä toimintaa ja kuuluvia ko maholista.
- ette selvittää kansalisen tason tehtävän ja hiippakunnitten teolookisen pohjan seurakunniten suhtheessa.
MONINAISUUS – MAHOLISUUS
Ruottin kirkon uskon, tunnustuksen ja opin sisälä löytyy tillaa tulkita mitä kristinusko ja kristitty elämä merkittee. Se oon tärkeä ette kirkonmenoelämä oon kummatki, lamu ja tuttu ja ette siinä oon monenlaisia ilmasuja. Moninaisuus kirkolisista perintheistä ja suunista, jokka sopiva Ruottin kirkhoon, rikastuttaa.
POSK meinaa
- ette se oon voimaa, ette erilaisia mallia ymmärtää ja puhua Jumalasta löytyy Ruottin kirkossa
- ette se oon tärkeä ette kaikki, riippumatta sukupuolisesta luonosta eli sukupuolten ylittävää itenttiteettiä eli ilmasua, respekteerathaan ja oon tervetulheita Ruottin kirkhoon, ja ette ei kethään kohelta miestuten sukupuolen eli muun syrjäämisen syyn vuoksi.
- ette hyväntahtonen mieli leimaa eri ryhmitten kohtaamista, vaikka niilä oon eri mielipitheitä kirkon asioissa.
- ette perintheet, jokka sopiva Ruottin kirkon uskhoon, tunnustukseen ja opetukseen, käytethään ja kehitethään.
KIRKKO JOKA PARANTAA
POSK halvaa ette Ruottin kirkko aktiivisesti tuopi tietolisutta nykyaijan kysymyksistä, jokka vaikuttava yhtheiskunnassa ja näyttää eri elämänmallia. Kristittyinä meilä oon tehtävännä hoitaa Jumalan luomakuntaa, jonka hään oon meile antanu ja ellää kestävästi yhessä. Ruottin kirkko pittää antaa toivetta ja kehottaa meitä othaan vastuuta.
POSK halvaa tehhä työtä
- ette Ruottin kirkon yhtheinen klimaattityö, Matkasuunitelma klimatille, prioriteerathaan.
- ette oikeuenmukanen kauppa ja kestävä käyttö maapallon resyrsiä saapi tukea.
- ette kaikki omasuuen hallinto pittää olla pitkäaikanen, tehokas ja eettisesti ja ekolookisesti vastuulisesti toimitettu.
- ette seurakunnat aina kehittävä kompetensiä uusista tiakoonisista tarpheista missä kohtaaminen ihmisiä monenlaisissa elämänvaiheissa oon keskipistheenä.
- ette suhtautumistapa intekrasuunityössä oon avoin ja sannoo tervetuloa.
- ette innostus ja rahotus kansainväliselle tiakoniile ja lähätystyöle nousee.
Tämä oon lyhyversuuni POSK:in ohjelmasta kirkkovaalissa. Koko ohjelma oon luettavanna ruottiksi.
Kyrkovalsinformation på olika språk, på Svenska kyrkans webb.