fbpx

POSKIN LYHYOHJELMA KIRKKOVAALISSA 2021

Kortprogram på meänkieli i kyrkovalet 2021

POSK – Puoluepoliittisesti vaphaat Ruottin kirkossa

TULEVAISUUEN NÄKY

POSKIN näky tulevaisuuele oon ette Ruottin kirkko pittää olla yhtheys, joka kuvvaa Jumalan tahtoa kirkonmenoissa ja elämässä ja joka selhvään puhhuu Jeesuksesta Kristuksesta.

VAPA KIRKKO

POSK meinaa ette poliittisten puolueitten vaikutus Ruottin kirkossa häätyy loppua. Luottamushenkilöt niistä ryhmistä muotoileva usseen kirkoliset säänöt samhaanlaihin ko valtion ja kunnitten. Net jokka päättävä Ruottin kirkossa häätyvä olla temokraattisesti valittu ja eustaa seurakuntia, ei poliittisia puolueita.

POSK halvaa vaikuttaa

  • ette äänestys-systeemi muutethaan helpomaksi ja halvemaksi
  • ette seurakunnat valitteva hiippakunnanvaltuuston ja kirkkokokkouksen jäsenet välilisissä äänestyksissä
  • ette maksoa luottamustehtävistä käytethään varovaisesti
  • ette päätöksiä mikkä koskeva seurakuntaa otethaan niin lähelä toimintaa ja jäseniä ko maholista
  • ette selvittää kansalisen tason ja hiippakunnitten teolookista pohjaa ja tehtävää

MONINAISUUS – MAHOLISUUS

Ruottin kirkon uskon, tunnustuksen ja opin sisälä oon tillaa tulkita mitä kristilinen usko ja kristitty elämä merkittee. Se oon tärkeä ette kirkonmenoelämä oon laaja ja silti tuttu ja ette löytyy monta eri ilmettä. Kirkoliset perintheet ja suuntautumiset mikkä sopiva Ruottin kirkon sisäle oon rikhaus.

POSK meinaa

  • ette kirkko joka ottaa vastuuen kaikista ihmisistä estää huonoa kohtelua sukupuolen eli muun tiskrimineerinkin perustala.
  • ette se oon tärkeä ette kaikin, huolimatta seksyellistä luontheesta eli sukupuolenylittävästä itenttiteetistä eli ilhmeestä, kohelthaan respektilä ja oon tervetulheita Ruottin kirkhoon.
  • ette päätökset, mikkä kirkkokokkous oon ottanu vihkimisestä saman sukupuolisia paria, seisova kokohnaisuuessa.
  • ette antelias kattanto leimaa ryhmänvälisiä kirkolisia kokkouksia missä oon erimielisyyttä

SEURAKUNTA KESKELÄ

Rakentaminen eläviä ja lähätystyötä tekeviä seurakuntia oon kirkon tärkein tehtävä ja yhtheinen käsky kaikile jokka kuuluva kirkhoon. Seurakunta ja kirkko oon perus jokhaisen kristityn uskossa ja kaikessa mitä kristityt saattava tehä yhessä. Kirkko pittää aina olla alaspainetun ja heijoman ääni ja olla valhmiina othaan vasthaan jokhaisen ihmisen.

POSK halvaa

  • ette vapaehtosia työntekijöitä kysythään, koulutethaan, innostethaan ja annethaan niile vastuuta
  • ette seurakunnat tekevä ekymeenistä työtä aktiivisesti.
  • ette trainee-vuosia ja senlaisia mallia käytethään instrymenttinä rekryteerinkissä.
  • ette köörilaulu ja kirkkomysikki oon arena joka selvästi antaa tillaa nuorten mysikille.
  • ette useamalla kirkkomyysikkerillä oon instrymentaaliopettamista heän virassa
  • ette joka seurakunnala oon suunitelma oppimiselle ja opetukselle pikkulapsesta raahvaassen saakka
  • ette innostuttaa kansanvälisseen tiakooni- ja lähätystyöhön ja ette siihen myönethään rahotusta

KIRKKO JOKA MERKITTEE VÄLIÄ

Kristittyinä meilä oon tehtävännä hoitaa luomakuntaa minkä Jumala oon meile antanu ja ellää kestävästi yhessä. POSK halvaa ette Ruottin kirkko aktiivisti antaa tietosuutta nykyaijan kysymyksissa mikkä vaivaava yhtheiskunnassa, ja näyttää erilaista elämänmallia.

POSK halvaa

  • ette joka seurakunnala oon tiakooni
  • ette isompi osa veroila rahotetusta hyvinvoinista hoijethaan Ruottin kirkossa
  • ette Ruottin kirkko ottaa vastuuen luomakunnasta estämällä klimaattimuutoksia
  • ette tukea oikeuenmukasta kauppaa ja kestävää käyttöä maan resyrsiä
  • ette kaikki omasuuen hoito pittää olla pitkäaikanen, tehokas ja tehty eettisesti ja ekolookisesti kestävästi
  • ette suojata sitä tärkeätä kylttyyriperinettä mikä meän kirkko oon ja ette kirkot piethään auki ja ette oon hyvä käytettävyys

 

Tämä oon lyhyversuuni POSK:in ohjelmasta kirkkovaalissa 2021. Koko ohjelma oon luettavanna ruottiksi.

Kyrkovalsinformation på olika språk, på Svenska kyrkans webb.

Översättning: Linnéa Nylund